Parlament da la baselgia chantunala - Katholische Landeskirche Graubünden

Il parlament da la baselgia chantunala è la legislativa da la Baselgia catolica dal Grischun. El decretescha las leschas e las ordinaziuns necessarias per ademplir las incumbensas da la Baselgia catolica dal Grischun. A medem temp ha il parlament da la baselgia chantunala la surveglianza suprema da l’administraziun generala e da l’administraziun da finanzas da la baselgia chantunala. El deliberescha ed approvescha il rapport annual da la suprastanza da la baselgia chantunala sco er il quint annual ed il preventiv. El sa cumpona:

da dus delegads elegids da l’Ordinariat episcopal;
dals commembers da la Regenza e dal Cussegl grond dal chantun Grischun da confessiun catolic-romana;
da 60 delegadas e delegads dals cumins-baselgia che vegnan repartids sin ils circuls electorals en relaziun cun la populaziun catolica.
da maximalmain diesch delegadas e delegads d’instituziuns e d’organisaziuns
che na vegnan betg cuvridas suffizientamain cun las plaivs.

Il parlament da la baselgia chantunala sa raduna per regla ina giada l’onn l’atun. Las radunanzas èn publicas. Ils commembers dal parlament da la baselgia chantunala han il dretg d’inoltrar moziuns, postulats, interpellaziuns e dumondas en scrit tenor l’urden da gestiun dal Cussegl grond.

Il president ed il vicepresident dal parlament da la baselgia chantunala, ils trais dumbravuschs sco era la presidenta ed il vicepresident da la cumissiun da gestiun furman il biro dal parlament da la baselgia chantunala. Il biro prepara las elecziuns dal parlament da la baselgia chantunala, elegia la cumissiun predeliberanta necessaria per las fatschentas dal parlament da la baselgia chantunala e decida davart il tractament e l’urgenza d’intervenziuns dals commembers dal parlament da la baselgia chantunala.